قصة اسمي: " ميريت" محبوبة الاله.

بابا كان مسيميني على اسم ملكة فرعونية. ابنة/زوجة رمسيس التاني. الاسم الاصلي ميريت آمون. 

معنى اسم ميريت: محبوبة الإله. 

انا اتسميت بسبب كم جملة في اوبريت ما. كان بيسمعه و هو شاب ذات ١٨ سنة بيوصف في جمال ميريت دي.. 

كان تقريبا كل يوم بيصحيني على الكوبليه ده 

"ميريييييت! بوركت الارض بك يا ميريت. الشمس تسطع على جبينك يا ابنة الشمس" 

و يقوم فاتح الشباك اللي كان عند سريري في حركة سيريالية مسرحية عشان الشمس تسطع في جبين عيني! 🙄 طرااااااخ!!!

انا اتولدت و بابا كان عنده ٤٢ سنة. يعني قعد يحلم بخلفته ليا دي فوق ال٢٠ سنة.. ده غير اني جيت بعد ولدين.. مستني البنت فوق ال٢٠ سنة عشان يسميها ميريت و هو بيحلم طول الوقت ده انها تطلع شبهها زي ما في الاوبريت.. و الشمس تسطع على جبيني ❤

المثير للاهتمام  انه قرر يزود اسمي في ليستة الشفاعات بتاعة صلاته اليومية.. الصلاة دي كان هو اللي كان مؤلفها و كان بيصليها كل يوم بليل.. 

و لما سألته على قصة القديسة ميريت اللي بيتشفع بيها  كل يوم بمنتهى الحماس؟ قالي انه ميعرفهاش!!قولتله اومال ايه هو بقالك ٢٠ سنة بتتشفع بيها؟! قاللي ان اكيد كان في قديسة اسمها ميريت بس مش معروفة.. او يمكن هيبقى في و يغمز لي.. 

وقتها مكنتش فاهمة يقصد ايه..

بس دلوقت كل لما افتكر (حديث مع اخواتي من كم يوم فكرني) الاول افطس على روحي من الضحك من كمية الدماغ اللي والدي كان فيها.. مش كفاية مقرر اسمي مع نفسه قبل ما يتجوز بالاف السنين. لا كمان بيألف اسم قديسة و يتشفع بيها يوميا بمنتهى الإيمان.

 من يوم ما وعيت على صلاته دي و هو بيتشفع بالقديسة ميريت و بيقولها من قلبه و بايمان و بنغمة معينة و تطويل في الاسم.. "و القديسة ميرييييت" كل لما افتكر اقعد اضحك لحد ما اقطع النفس، هو ازاي كده! 😁

 ثم ابتسم ابتسامة من روحي و قلبي قبل وشي... ابويا كان عنده طموحات كبيرة اوي ليا.. 

طموحات في اخلاقي و جمالها زي الملكة الفرعونية اللي سماني عليها، ثم طموحات روحية تفوق الخيال.. (ما انت عارف تربيتك يا والدي.. دفنينه سوا.. قالك القديسة ميريت.. خلي الطابق مستور) اهه كلها احلام و طموحات.. 

نأسف على كم الديسابوينتمنت اللي بسببهولك.. بس برده انت اللي شطحت في احلامك يا سيد الناس.. غلطتك يا غالي 😁

فرحانة باحلام والدي ليا و فخورة اكتر بعلاقتنا اللي هو بداها قبل ما اتولد ب٢٠ سنة.. كل لما بضعف او اشك في نفسي و عبثيتي، افتكره و افتكر ايمانه بيا :) 

..

اي لاف يو بابا 

‏""مثل نجمة سوبدت المشرقة في مستهل عام جديد.

المنيرة المبهجة الواضحة الطبائع 

جميلة العيون عندما تنظر 

حلوة شفتاها عندما تتحدث

ليس لديها اقوال زائدة""

~مقطوعة غزلية بالمصرية القديمة 

"إنها جميلة المحيا مضيئة لقصرها كلما خطت، حبيبة سيد القطرين، تقف دائما إلى جانب مليكها رمسيس الثانى، كما يجاور نجم الشمال الجوزاء عازفة شخشيخة سيستروم للآلهة موت، وعازفة الهارم للإلهة "حتحور، منشدة طروب لباقى الآلهة".. هذا ما نقله كتاب "موسوعة أقاليم مصر الفرعونية قنا – سوهاج، عن النقوش الفرعونية.

عازفة الهارم للإله هتحور ، و منشدة طروب الاله وذلك وفقا للنقوش المدونة على الجدران .

يا ريت لو حد عرف يوصل للاوبريت يبعتهولي :) 

It will mean the world to me.