Friday, February 23, 2018

السكر versus الكُبّة !

ابني بيروح يلعب في نفس الpark كل يوم و التاني, و في كم طفل تانيين برده ثابتين بنشوفهم تقريبا كل مرة..  
من يومين ام طفل اخدت كورة ابني بدون استأذان و قعدت تلعب بيها مع ابنها و رموها برة و دخلت جنينة بيت. Oopsiiii. راحت ست الحتة😱.. مامته قعدت تضحك -مش عارفة ليه- و قالت لي sorryو هي بتضحك! طبعا انا دمي اتحرق لان ابني زعل و قعد يقولي عايز الكورة..
اسكت؟؟!! لست انا!  فقررت اخبط على الجيران و انا بصلي ميشتمونيش او يخطفونا 😂😂 خيالي واسع معلش 😂  (الى يومنا هذا انا ساعات بلوم نفسي اني مهزأتهاش.. انها شايفة ابني مقهور و هي و ابنها السبب و عمالة تضحك.. انا اصلا مش فاهمة ايه اللي يضحك في الموقف!! المفروض كنت اخليها هي اللي تخبط عليهم او تجيب لابني كورة بدالها او على الاقل تعتذر له بجدية بدل ماهي عمالة تضحك على زعل طفل يدوب ٣ سنين!!! كل لما افتكرها اشمئز #^*₩¥@##*&^ )
المهم  خبطت عليهم فعلا و اعتذرتلهم -مقدرتش اسيب ابني مقهور على الكورة- الراجل قاللي ان دي جنينة الجيران وانهم مسافرين و مقفولة و اعتذرلي.. بعد كده راح فاتح الباب تاني و نادى عليا و قاللي هحاول اجيب لك المفتاح من صاحب البيت و تعالي بكرة انشالله اكون جبتها.. و اعتذر لابني انه مش قادر يجيبهاله دلوقت و وعده يجيبهاله بكرة :))) {فرق السما من الارض من رد فعله اللي هو اصلا ملوش ذنب و بين الكُبّة التانية اللي عمالة تضحك 😏} و قاللي لولا ان ده غير قانوني انا كنت نطيت من فوق السور جبتهاله (الراجل مش اقل من 50 سنة!) و لما اعتذرت له على الازعاج قاللي ما معناه انتي هبلة! انا بجيب كور من الجنينة بقالي 37 سنة و ده جزء من روتيني اليومي! (لسة مزهقش؟ ده مش بس مزهقش, ده مبسوط!) و قعد يلاعب ابني و يضحكه و يتحايل عليه ميزعلش على الكورة (روح يا شيخ الهي يبارك لك) 
خبطت عليهم تاني يوم برده و انا مرعوبة لا يكون في إن  .. اصله too good to be true😂😂 خيال واسع مريض بقى😂  ابنه بتاع 14 سنة فتح لي و قالي انا مش فاهم انتي عايزة ايه بس بابا مش موجود و هييجي كمان ساعة ابقي تعالي له! 🤔🤔 و كان مقلق مني اصلا.. 
بعد شوية لقيت الولد جالي لحد عندي في ال park يقوللي انا كلمت بابا و فهمت القصة و هو بيعتذرلكم لانه مقدرش يجيب المفتاح زي ما وعدك.. 
و لقيت الولد راح مديني كورة تانية شبه بتاعة ابني.. قلتله دي مش بتاعتنا قاللي مانا عارف بس ممكن ابنك يلعب بيها.. سألته هي دي بتاعتك؟ قاللي ايوة, شكرته جدااااا و قلتله انا هبقا اجيب له كورة بدالها و تنحت طبعا من جمال العيلة و تفهمهم .. ازااااااي جمال كده.. 
لما يكون الاهل كده, طبيعي الاولاد تطلع كده :)
معنى انه محتفظ بكورة طفل و هو طولي كده انها تراث و محتفظ بيها لانها غالية عليه... و مع ذلك كان هيديها لابني!!!
انا مش قادرة اوصف مدى تأثري بالعيلة دي و عمالة بدعي لهم من ساعتها.. و بدعي اعرف اربي ابني و بنتي كده.. 
المحبة حلوة مفيش شك :) انك تكون قدوة حسنة لاولادك دي حاجة اي حد هيقابل اولادك هيدعيلك عليها :) ناس هتخبط على باب اولادنا مجازيا -او حرفيا زي القصة دي- و احنا هنكون السبب في انهم يفرحوا ناس و يسندوهم او انهم يكونوا سبب حزنهم -زي الكُبّة التانية 😏.. او يبقوا ولا الدموع، ملهمش اثر.. انا شخصيا نفسي ابقا زي الراجل ده.. الناس لما تتعامل مع اولادي يدعولي و يدعولهم :)

*الست تاني يوم جابت لابنها كورة و مرضيتش تخلي ابني يلعب معاه بيها! 
**فبراير ٢٠١٨ بعد سنة و نص، مع الاسف انا لسة منفسنة من الست😬! غالبا قلبي طلع اسود.. زي اي ام مصرية اصيلة 😈 مبعرفش أ let go في اللي يدوس لعيالي على طرف.. مش فارق معايا انهم اخدوا الكورة ولا انهم ضيعوها.. بس فارق معايا انها ضحكت على قهرته! و تاني يوم كمان جاية تكمل عليه بمنتهى التناحة! 😬😬

*** لسة بدعي للراجل و ابنه :) غالبا قلبي لسة فيه حتة بيضة مبتنساش الحلو اللي يتعمل لعيالي :) ❤  
**** ابني لحد دلوقت فاكر ان الكورة ضاعت في الكورنر ده و دخلت الجنينة دي.. بس لأن قلبه انضف من قلبي بمراحل فمش فاكر ملابسات الاحداث. بس فاكر ان جيران الpark ناس لطيفة :)

ميريت نبيل 
نوفمبر ٢٠١٦

No comments:

Post a Comment