Tuesday, January 9, 2018

اشفنا من مرض اعتياد الاشياء

مش عايزة ابطل انبهر و استمتع بالمتع الصغيرة بتاعة كل يوم.. مش عايزة اخد اي حاجة فور جرانتد.. امين يا رب اشفينا من مرض اعتياد الاشياء..

رغم الوجع.. مش عايزة اتعود على الحاجات المؤلمة و افقد احساسي بالالم او الغضب او الحزن.. مش عايزة افقد اي جزء من آدميتي. ارئف بينا يارب من مرض اعتياد الاشياء

رغم الصدمة مش عايزة ابطل اندهش لما حد من صحابي يندل معايا.. مش عايزة ابقا عايشة بمبدأ ان ده العادي و مبقاش يصدم.. 
مش عايزة لو اسمع اخبار وحشة عن حد -حتى لو معرفوش.. بل حتى لو بيننا خلاف - مش عايزة ابقا متبلدة او ميفرقش معايا.. عايزة اتضايق له و اتعاطف معاه.. بل و اصليله
مش عايزة احس انه عادي لما حد يعملي حاجة كويسة.. عايزة اقدر اقدّر كل حاجة مهما كانت صغيرة

مش عايزة اعيش منغير احلام ولا منغير توقعات.. عايزة افضل محتفظة بالامل .. الامل الي بيبقا السبب في اننا نمشي لقدام بقوة و رؤية زي ما ساعات بيبقا هو السبب في اننا نتوجع و نحبط و نتصدم و نغضب..

عايزة يفضل فيا امل ان انا ممكن ابقا احسن.. و ان انت هتبقا احسن.. و ان بكرة هتروق و تحلى :)

ميريت نبيل 
١٤ مايو ٢٠١٤

No comments:

Post a Comment