Saturday, October 28, 2017

بحبك.. يعني قررت اشوف جواهرك

دايما بنحكي و نهري في فكرة ان اللي بيحب حد بيبقا شايف عيوبه بس قابلها زي ما هي.. محبة و قبوا بلا شروط بالتغيير..
بننسى ان اللي بيحب حد بيشوف الاحجار الكريمة اللي فيه.. حتى اللي الشخص نفسه مش شايفها..
بنشوف الحلو و نقول عليه.. نفكرهم بالسحر اللي في روحهم..
اينعم الحب متوقف على المحب وحده.. قراره بانه يقبل المحبوب زي ما هو. الا ان كلمة زي ما هو دي مش معناها انه وحش بس انا قررت احبه و خلاص..
معناها برده اني قررت ادور و ادعبس على الحلو اللي فيه.. آمنت ان فيه سحر بتاعه هو بس.. بيميزه عن غيره.. صدقت و التزمت اني كل يوم اكتشف فيه حاجة حلوة حتى لو شخصيا مش عارفها..
بحبه بعيوبه ايوة, بس بحب و شايف الاحجار الكريمة اللي ساكنة روحه.. سواء الperfect cut اللي باينة و ظاهرة على الوش او المدفونة وسط الوجع و حدة الطباع.. او اللي محتاجة تنقيب ثم تنضيف عشان تشوف لمعانها و جمالها..
زي ما مفيش حد منغير عيوب, مفيش حد منغير جواهر :)
اقرر اني احب شخص, يعني اتعهد باني اتقبل اي عيب و برده اتعهد اني اقدر كل ميزة.. اتعهد اني اشجع الشخص بلا ضغط او اجبار انه يتغير للاحسن, اديله دعم و حافز لكن مجبروش, اتعهد باني في كل وقت و بالذات وقت الضعف و الانكسار افكره و اوريله سحر روحه و مواطن جمالها و تفردها..
اللي بيحب حد مش بيمن عليه... اللي بيحب حد بيتعهد بكشف الاحجار المدفونة و مراعاتها و حفظها و المساعدة في اظهارها و تلميعها و كشفها للكل :) 

ميريت نبيل
نوفمبر 28, 2016

No comments:

Post a Comment