Thursday, June 29, 2017

الحرب فين مع مين ضد مين


بمناسبة الاحداث و كمية الفرق (جمع فريق) اللي شغالة عالسوشيال ميديا سياسيا و دينيا و هكذا. 
في موقف حصلي يوم السبت خلاني اطلع بالهليكوبتر فوق كل الاحداث و مية ساقعة تفوق عالصبح كده
احنا هنا في حرب و حرب شرسة جدا بس مش مع بعض.. حرب نهايتها ابشع من الدم لأنها مش مع بشر
عدونا ناصح و شاطر.. شاطر بمعنى بيقفل امتحانه و شاطر بمعنى بيقسم و يشطر الوحدة لحتت صغيرة..
هو قادر و قوي و عنده قوات كبيرة و مخلصة ليه و مطيعة و منتشرة و مبتضيعش وقت.. كلهم شطار مش خيابة زينا
و بيعملوا حاجة خبيثة اوي.. عمالين يحطوا في دماغنا ان عدونا هو الاخر.. بينسينا و بيلغوش انه هو عدونا فننشغل احنا عنه ببعض و كمان بالعكس بمحاربتنا لبعض بنساعده في القضاء على بعض!
بدل ما نمسك في بعض بنكسر فبعض!! عشان نساعد مين ؟ ايوة بنساعده هو.. بنساعد عدونا الحقيقي!!!!
الحياة اكبر اوي من الانتماءات الارضية  و المسميات و الشغل و الاجتماعيات بل و الوطنيات و حتى التقسيمات الدينية
احنا كلنا بننتمي لله خالق الكل و ضابط الكل حتى لو مش مؤمنين بده او لو مش واخدين بالنا
كلنا عدونا واحد برده حتى لو مش واخدين بالنا
كلنا لينا قيمة واحدة في اللي خالقنا حتى لو تهنا و افتكرنا ان قيمتنا في حاجات تانية..
الموضوع جد و اكبر مننا جدا عشان كده محتاجين نركز فحب نفسنا و حب بعض و حب ربنا اللي هو مصدر قوتنا الوحيد و الوحيد اللي يقدر يخلينا نكسب الحرب المستحيلة المرعبة ديه

No comments:

Post a Comment