Thursday, June 29, 2017

بحبك يا مصر.. يا بلدي!


مصر النهاردة كانت واكلالي دماغي
مصر كلها
بشوارعها.. بناسها.. بجهلها و حبها
بتاريخها المفخرة و بحاضرها المهزلة
مصر..
أنا بحب مصر
بكل اللي فيها.. بكل فخر و بكل حب.. بلدي هي مصر
مصرنا الحبيبة
أيووووه يا عالم عالمنظر
طبعا المنظر ده كان و هي فاضية..
مصر حلوة أوي و جميلة
بنت حلوة بعيون سمرة مكحلة طبيعي و شعر الاسود طويل مالي الليل
إحنا اللي نعكشاها و حولناها
كتر الف خيرها لسة لمانا حتي بعد ما بهدلناها
مصر ببناتها اللي بميت راجل.. البنت الحلوة النغشة الدلوعة
و الجدعة اللي تعرف تسد.. و توقف اجدعها راجل عند حده
مصر برجالتها الجدعان اللي ساعت الجد ملهمش زي
المصريين بجد
اللي الشمس حرقت جبينهم و العضل ملا دراعتهم
اللي بيشتغلوا بجد
مصر اللي بجد مش اللي الناس خلوها كده و قالوا عليا مصر
مصر هي حبي الاول.. بلدي.. الوطن
مصر شافت كل حاجة انا شفتها
شافت دمعي و فرحي
و أحلامي و ندمي
شافت صلوات اتحققت و اماني اصبحت سراب
مصر فيها الناس الجدعة مش كل اللي فيها وحشين
فيها أجدع ناس
فيها أطيب ناس
فيها الام الاصيلة اللي ربت عيالها و نسيت نفسها فيهم
فيها الاب اللي شارب المر عشان يكبر عياله و يريحهم
ليها لجأ المسيح
مبارك شعبي مصر
فيها الاولاد اللي بيرعوا اهاليهم
و يعدوا المسنين الشارع رحمة و حب
فيه اللي يسند ست و يقولها يا أمي
فيها الراجل و الست اللي يدعوا للشباب فالشارع من غير سبب ولا إنتظار لمقابل
فيها...
فيها إحساس ميتوصفش
فيها كل حياتي و أحلامي و بكايا
فيها مصر!!!!
رغم ترابها و عفارها
رغم الدوشة و الزحمة
رغم المعاكسة و الفهلوة و الفتي
رغم المجهول ..
رغم كل شييء..
ملياش غير مصر أقول عليها.. و أحب أقول عليها" بلدي"
يا بووووي يا بوي يا مصر اما الواحد بيحبك حب
و حلوة يا بلدي

No comments:

Post a Comment