Saturday, June 10, 2017

الحق محرر.. و الحرية حياة!

#لا_تطفئ_الشمس
‏بعيدا عن المسلسل مش قوي، بس جميلة و مالك و ممدوح و الخشت بيمثلوا قضايا انسانية. و بيمثلوها حلو! مشهد مالك/ادم امبارح -الحلقة ال١٤-  مؤلم وحقيقي جدا 
‏لحظة مواجهة الحقيقة بدون تجميل او تزييف. الحقيقة المجردة. لحظة مابترفع المفرش الجميل وتكشف كل العفن اللي تحته. لحظة مؤلمة وبدون دعم بتبقا رهيبة.. بدون دعم ممكن توصل لموت! 
‏اكتر الشخصيات انا معجبة بيها لحد دلوقت هي شهيرة/مريم الخشت (ايه يا امي الاسم ده!) .عارفة هي عايزة ايه. صاحبة مبدأ. شخصية ايجابية وفعالة في حياتها الشخصية وفي المجتمع. عادي بتجرب و بتتعلم و بتطور و متصالحة مع حقيقة وجود ضعف و غلط و بتتعامل بايجابية مع امكانية التعلم و التغيير و تخطي الاخطاء.
بصرف النظر عن تفاصيل المسلسل او عن المسلسل كله.. اكتشفت ان اعجابي بالشخصيات بيبقا له علاقة بحقيقتهم مع نفسهم قبل اي حد.. ايمانهم بفكرة او مبدأ الحق في الحرية و التفكير في دوافعنا و بناء خلاصات خاصة بالشخص بعد تفكير و تساؤل و و و .. ايمان مش مجرد اعجاب.. ايمان يديك قوة تدافع عن نفسك و عن الاخرين.. حرية .. حرية تخليك قادر تعترف بشجاعة لما تكون غلطان.. حرية تديك قوة تحاول و تجرب تاني.. الشجاعة و القوة دول تعملهم لنفسك مش قدام حد ولا عشان تثبت لحد حاجة.. حرية! الحرية مصدر الهام بالنسبة لي.
الكتمة و الكبت و الانكار و الهروب راحتهم مؤقتة و مزيفة..
الكشف للذات فيه تطهير و تنقية..
الارواح بتكمكم..
‏الاجابات اللي بنتهرب من اجابتها، دوافعنا اللي بنخاف نعرفها او نواجه نفسنا بيها، هتفضل زي ما هي.. الكتمة بتزود العفن مش بتطهر زي ما بنتدعي..
و مسئولية تحمل القرارات.. تتحملها مش تشيلها لحد تاني ولا تهرب منها.. بفكر و اقرر و اعمل و اتحمل النتايج.. اعامل نفسي كشخص بالغ رشيد.. متصالح مع انسانيتك بكل ما فيها من تفرد و قوة و ضعف.. توازن.. بتعافر.. تتعب و تقوم و تجرب تاني.. تدي العيشة و اللي عايشينها بالبوكس في مناخيرها.. و مرة تانية تبكي لوحدك في الضلمة او تعد في حضن امان بالنسبة لك تبكي فيه.. حرية.. انسانية.. بدون تجميل او تزييف او ادعاء.. كأسلوب حياة.. لان مفيش حد عايش كده طول الوقت..

ممكن اختلف معاك في طريقة حياتك، بس مقدرش محترمكش طول ما انت واضح و حقيقي ولا تدعي و لا تجبر غيرك على اسلوبك. احترم احترامك لعقلك و شجاعتك على التجربة.. احترم قوتك في الثبات على الحق.. احترم شجاعتك و مسئوليتك في تحملك لتبعات قراراتك.. 
اقتناء النفس مش بالساهل.. مش رخيص.. له تمن على كل الابعاد و المستويات.. بس تاني و تالت و رابع و خامس و للابد: ماذا ينتفع الانسان لو ربح العالم كله و خسر نفسه!

No comments:

Post a Comment