Tuesday, May 30, 2017

المنافسة الصحية




ساعات فجأة بنلاحظ ان اولادنا بقا عندهم تنافس رهيب! عايز يكسب اي حاجة و خلاص.. عايز يبقا الاسرع و الاقوى و الاشطر و و و .. بنلاحظ ده لما تظهر المشكلة: انه مش قابل الخسارة.. يعيط او يصرخ لو خسر.. مش قادر يفرح لغيره.. او على الاقل مش قادر ميحقدش عليه.. عايز يعمل في اللي كسب حاجة!
 ايه اللي ممكن يخلي طفل يفقد بساطته و روحه الرياضية؟ و ليه؟
غالبا غالبا بيبقا احنا كأهل او المدرسة اتبعنا اسلوب “ياللا نشوف مين اشطر؟ مين هيخلص الاول؟ مين هيكسب؟ و ردة الفعل على اللي كسب فرحة و فخر و تهليل بينما بنعنف اللي خسر او اضعف الايمان بيتم تجاهله..
الاطفال مش معقدين زينا.. بياخدوا و يفهموا الحاجة زي ما تبان من برة.. ليهم منطق مختلف عننا احنا الكبار.. فلو مقلناش بصراحة و وضوح اننا بنحبهم حتى لو خسروا.. لو مقلناش مباشرة ان اهم حاجة انه حاول و اننا فخورين بمجهوده.. لو مشجعناهوش انه المرة الجاية يقدر يعمل احسن.. غالبا النتيجة بتكون انه بيفتكر انك مش بتحبه.. مش فخور بيه.. مش فارق معاك لا انه حاول ولا مجهوده.. مش فارق معاك انه له حاجة تانية متميز و شاطر فيها..
الرسالة اللي بتوصله : انت فاشل.. انا مش بحبك ولا فخور بيك.. حبي ليك مشروط بالفوز! 🙁
بنعمل حاجات كتير و احنا مش قاصدين و مش واخدين بالنا.. يعني غالبا الاهالي اللي بتتبع اسلوب المنافسة ده بيبقا هدفهم يحمسوا و يشجعوا اولادهم.. او حتى اقصى طموحهم انهم يخلوهم يخلصوا اكلهم بسرعة..
بس ايه التمن؟
التمن مش بس انه هيفتكر ان حبك ليه مشروط بالفوز.. و ده ضغط رهيب على طفل محتاج يتاكد و يطمن انه محبوب بلا شروط (ده حتى احنا الكبار بنحتاج نعرف اننا محبوبين رغم كل شيءٍ)
ده كمان بيأثر على علاقة الطفل باخواته او اصدقائه او زمايله..
مش بس كده.. دي صورته الذاتية بتتأثر و مش هيشوف لنفسه قيمة او سبب للقبول و الحب الا من خلال الفوز.. لو خسران ابقا فاشل و مش محبوب و و و
طب و الحل؟ نحمسهم ازاي؟ يعني منعملش مسابقات ابدا؟ طب و الرياضة؟ طب و درجات الامتحانات؟ طب و فقرة الاكل اللي مبتخلصش غير بالطريقة دي؟
ممكن بدل ما نخليهم يسابقوا بعض نخليهم يسابقوا نفسهم
يعني اخر مرة انت عملتها في 10 دقايق, خلينا نشوف المرة دي هتعملها في قد ايه..
كده هيتعلموا انهم مش محتاجين يقارنوا نفسهم بحد عشان يبقوا احسن.. هيتعلموا انهم دايما يطوروا من نفسهم.. يكونوا افضل version من نفسهم منغير مقارنة مع شخص تاني
ممكن لما يخسر امدح مجهوده و افكره انه متميز في حاجة تانية
هيتعلموا ان لكل شخص نقط قوة و نقط ضعف.. هيعرفوا انهم متميزين و متفردين و ان كل شخص عنده جوهرة بتاعته هو بس (ممكن نجتهد شوية معاهم عشان نكتشف ايه هي جوهرته اللي بتميزه.. عطية الله ليه اللي من خلالها هينفذ هدفه في الحياة).. لما يكبروا هيعرفوا ايه نقط قوتهم اللي هتساعدهم يحققوا هدفهم في الحياة
هيحتفظوا بسلام نفسهم و سلامهم مع الاخرين
مش هيتعلموا الغيرة ولا الحقد ولا هيتمرروا من الهزيمة قدام حد
ولا هيحقدوا على حد لما يكسبهم (في السن و الحالة دي مع الاسف بيبقوا الأخوات)
نظام السباق ده مش بس بيدمر نفسية الطفل و يكبره على قيم مغلوطةبس , ده كمان بيدمر علاقة الاخوات ببعض.. لان الطريق الوحيد لمكسبي هو: خسارة اخويا

No comments:

Post a Comment