Monday, April 24, 2017

الغضب حماقة يا حورية! انهوها باحترام بعيدا عن الEgo اللعين

‏طبيعي انك تفضفض مع شخص قريب تحكيله وجعك و غضبك من شخص تاني..طبيعي بل وصحي. بس تفرق فرق رهيب ان نيتك متكنش الفضح -و بالتالي مش بتحكي للبشرية كلها!
‏الستر لا يتعارض مع الفضفضة لشخص موثوق فيه. شخص تنقيه بحكمة. متكنش عارف مقدما انه هيسخنك. شخص انت عارف انه مش هيغير رأيه في اللي بتحكيله عنهم (نية الفضح بتبان هنا زي ما بتبان لو حكيت لأمة لا إله الا الله)
‏هدفك ميكنش التجريح والفضح. هدفك يكون تنضيف احشائك وقلبك من الطاقة السلبية اللي جواك. انك تلاقي حد يحس بيك ويهديك ويساعدك ترمي الموضوع ورا ضهرك
‏محدش هيعرف دوافعك و اهدافك غيرك.. بس اجمل من النية الحسنة وحدها ان النية الحلوة دي تكون مصحوبة بشوية حكمة في نحكي لمين و ممزوجة بوعي بنحكي ليه.
اسمع نفسك و انت بتحكي. ركز مع الاحساس اللي حاسس بيه و انت بتحكي.. tone صوتك.. هتعرف كتير..
الشخص اللي بتحكيله لو فعلا قريب و بيحبك هيساعدك تميز دوافعك. هيواسيك و يهون عليك او هينبهك انك طالع برة الطريق و هتخبط في السور!

‏في النهايات بيظهر اغراءات و ال ego بيبقا له طلعات ذات نزعة انتقامية ممكن متتخيلش انها مدفونة جواك زي المارد اللي في المصباح. مستني دعكة صغيرة عشان يتحرر و ينطلق و يحقق لك كل امانيك الانتقامية المتمررة. ال ego لعين! و الانتقام مغري جدا بالذات وقت الغضب.. الغضب حماقة يا حووورية

No comments:

Post a Comment