Wednesday, March 22, 2017

من حقي!

من حقي و حقك
من حقي حاجات كتير جدا لو كنت بتنازل عنها فده عن إختيار و حب مش عن إضطرار أو خوف
لأن من حقي أتنازل عن حقوقي بالحدود و الكيفية و المواعيد اللي انا شايفاها مناسبة..
من حقي ان اللي اتنازل عنه مرة ماتنازلش عنه تاني
من حقي إني أوضح إن اللي بعمله ده حب مش واجب
و زي ما أنا عايزة الناس يحترموا حقوقي و يقدروا تنازلاتي من حقهم عليا إني أقدر و أحترم حقوقهم إللي زي حقوقي بالضبط
من حقي إني استمتع بالحياة اللي ربنا إداها لي بحسب إرادته
من حقي أعبر عن نفسي -من حقك ماتسمعش- بس من حقي أعبر
من حقي أحزن و أغضب و أعترض مادمت مبغلطش أو أجرح حد
من حقي أحب الناس و أحترمهم و أعاملهم كويس مهما كانوا مختلفين أو مهما تسببوا ليا في ألم.
من حقي أحافظ علي مشاعر الاخرين
من حقي إني أختلف مع أي حد في وجهة نظره لأن من حقي يكون لي وجهة نظر مختلفة
و من حقي أضع حدود لأي من علاقاتي
من حقي أمنع من يأذيني و إني أحدد المساحة الكافية بيني و بين الناس
من حقي إني أسامح و ده بإرادتي مش عن إجبار
من حقي إني أطالب بإحتياحاتي..
من حقي إني أعلنها أو أحتفظ بيها لنفسي او اكشفها للي أختارهم بس
من حقي إني أرفض أني أتاخد ببلاش أو بنظرية الحق المكتسب
من حقي أقرر أي شيء يخصني مادمت اتحمل نتائج قراراتي
و ده ميمنعش أن من حقي أغلط !
و من حقي أتعلم من أخطائي
من حقي اصلي و أن أحب الله
من حقي أتكلم معاه و عليه بلا كبت
من حقي أفكر.. أشعر..
من حقي أدافع عن آدميتي و عن نفسي و عن أفكاري و مشاعري و أحلامي و إنسانيتي و مبادئي
من حقي إني مسمحش بإنتهاك حقوقي
من حقي و من حق الاخرين عليا إني أحترمهم و أحترم إختلافهم و أحترم آدميتهم حتي لو هما نفسهم محترموهاش
من حقي إني أرفض ما لا يناسبني ما دمت لا أجبر أحد
من حقي إني يبقي ليا وقت بتاعي و خصوصية أنا اللي أختار مين ينتهكها و إمتي و إزاي و إن إنتهاكها ده مش العادي
من حقي أضع حدود.. و من حقي أغيرها او حتى الغيها
من حقي مقبلش اللي قبلته قبل كده

من حقي ادي فرصة تانية و ألف او لأ 
من حقي إني أختار..
من حقي أكون سعيدة
من حقي أطالب بإحترامي
من حقي إني.... أعيش

لأن الله اداني الحياة ديه عشان أحياها مش عشان حضرتك تلغيها.. كل واحد حر في لغاليغه!

Marmaritaaa
December 2008


https://m.facebook.com/notes/mirette-nabil/%D9%85%D9%86-%D8%AD%D9%82%D9%8A-part-ii/43564962849/

No comments:

Post a Comment