Thursday, June 2, 2016

المحبة

اكتر حاجة بتستنزفنا هي العلاقات و الجهد و الطاقة و الوقت المبذولين فيها.
دور على علاقة محدش فيها بيشوف التاني كامل. تشوفوا فيها ضعفات بعض بس من خلال عين محبة. تشوفوا عيوب بعض بوضوح و تقبلوها. محدش يبقا خايف من معايرة. علاقة تشعر فيها بأمان يخليك قادر تكون نفسك بلا زيف او اقنعة. متحتجش لا تكذب ولا تتجمل. متخافش لا من رفض ولا من شروط!
مطمن و مخلي الاخر متطمن انكم لو كشفتوا ضعفكم و فصحتوا عن اخطاء انفسكم للاخر -حتى الاخطاء اللي اتعملت بقصد و بوعي- ان الاخطاء دي و الافصاح عنها مش هيكون سبب رفض او معايرة او كارت يستخدم ضدك في اي وقت.
احب اكون في علاقة اكون متأكدة فيها ان رغم تأكدي من عدم شرطية القبول الا ان يكون لكل منا الحق و الشجاعة و المساحة اننا نقول لبعض &اللي عملته ده غلط& بل اني اكون معتمدة على الحق ده. يكون الاخر مرايتي اللي بتوريني الحقيقة زي ما هي منغير مجاملة, برفق ايوة لكن منغير تخفيف ولا مبالغة. رأي أثق فيه. يساعدني اعرف نفسي بعيوبي و اخطائي و مميزاتي. يساعدني انمو و اتغير للافضل.
شخص يكون قادر يشوف عيوبي و ان ده ميأثرش على حبه لي. يحبني و يقبلني بلا اي نقصان. ميبخلش بحبه ولا يعاقبني على ضعفي و عدم كمالي او حتى تقصيري. ميكنش بيقارني بصورة في خياله ولا بيحاول يغيرني لا للصورة دي ولا لشخص اخر غير نفسي. كل مبتغاه انه يساعدني اكون & انا افضل& لانه مؤمن اني اقدر اكون افضل منغير ما افقد هويتي.
شخص يديني الامان اني اقول له &انت غلطان& منغير ما اخاف من رد فعله, انه يبعد او يتقوقع على ذاته او يعتبرها اهانة او يترجم كلامي على انه رفض او ادانة. شخص مديني مساحة و حق و ثقة اني اقوله انه يقدر يكون احسن.
المحبة تطرح الخوف خارجا. الخوف و الذات والكبرياء.
لْمَحَبَّةُ تَتَأَنَّى وَتَرْفُقُ. الْمَحَبَّةُ لاَ تَحْسِدُ. الْمَحَبَّةُ لاَ تَتَفَاخَرُ، وَلاَ تَنْتَفِخُ، وَلاَ تُقَبِّحُ، وَلاَ تَطْلُبُ مَا لِنَفْسِهَا، وَلاَ تَحْتَدُّ، وَلاَ تَظُنُّ السُّوء، وَلاَ تَفْرَحُ بِالإِثْمِ بَلْ تَفْرَحُ بِالْحَقِّ، وَتَحْتَمِلُ كُلَّ شَيْءٍ، وَتُصَدِّقُ كُلَّ شَيْءٍ، وَتَرْجُو كُلَّ شَيْءٍ، وَتَصْبِرُ عَلَى كُلِّ شَيْءٍ.&
مفيش علاقة كاملة زي ما مفيش شخص كامل. بس في ناس بتحاول. بتعرف و بتتعلم ازاي تقبل و تحب الاخر منغير ما تقع تحت ضغط &ان عندنا مشاكل& ناس بتعافر سوا و مش بتستسلم. ناس مش بتتوقع الكمال لا من الاخر ولا من العلاقة.
لو لقيت العلاقة دي متفرطش فيها تحت أي ظرف.. لو انت في علاقة عافروا سوا لحد ما تخلوها كده. لو لسة  دور على علاقة بالمستوى ده, متتنازلش انك تكون الشخص ده و مع شخص بيعافر معاك عشان انتم الاتنين تبقوا افضل

@marmaritaaa