Sunday, September 20, 2015

نفسي يجيلي جواب بخط الايد



http://masreiat.com/scheherazade/2015/09/22/23738

نفسي يجيلي جواب مكتوب بخط الإيد، مش ايميل. حد يقعد برواقة عشان يكتب لي مخصوص، يسأل عليا بجد و يحكي لي حاجات مفرحة و كئيبة نفسه يشاركها معايا. حد تعب و نزل إشترى دمغة و دور على صندوق بريد. حد استنى بفارغ الصبر ردي عليه -برده بجواب بخط الايد.


عندي حنين لايام الطفولة لما كان عم عبد الملاك يقولي  "جالك جواب" كانت فرحة الدنيا كلها و احساسي اني شخص مهم جدا... نفس الاحساس لما كان جرس تليفون البيت يرن و نطلع نجري كلنا عليه و نستنا نعرف مين المهم و سعيد الحظ اللي جاله تليفون :) نفس الاحساس لما اونكل شوقي كان يبعت لبابا جواب فيه كم سطر بيكلمني فيهم و يطلب من بابا يقراهم لي عشان وحشته و نفسه يقولي كلمتين ليا انا مخصوص.. و لما يجي بابا يرد عليه يناديني عشان اكتب له انا كمان اللي نفسي فيه.. ولا جوابات الاصحاب اللي هاجروا و اللي سافروا.. ولا حتى ورقة صباح الخير اللي صحابي في الشغل بيسيبوهالي على المكتب عشان اجي الصبح الاقيها.. ولا ال notes اللي ابويا كان بيسيبهالي الصبح عشان صعبت عليه يصحيني بدري "صباح الخير يا مرمر" مرمر دي عمره مقالهالي غير في الجوابات :)


نفسي يجيلي جواب من دول!


ليه محدش عنده وقت يجيب ورقة و قلم و يبتدي يكتب بخط حلو؟ و لما الحماسة تاخده ينسى موضوع الخط الحلو ده و يتقلب نبش فراخ عشان ايده مش ملاحقة كمية الكلام اللي نفسه يقوله، كلام طالع من القلب  للورقة عدل منغير تكليف ولا حسابات، مفيهوش "ديليت".. و اعد انا افك الطلاسم دي بالساعات  بس على قلبي زي العسل و على وشي ابتسامة بلهاء بس حقيقية كأني طفل متحمس يفك ورق الهدية . و اشيل الجواب في الصندوق اياه اللي بشيل فيه ذكرياتي الغالية. ماهو اصل ان يجيلك جواب بقا شيء مثير للدهشة و لرقص القلب و بهجته.


نفسي ابعت لناس كتير جوابات كتبتها من سنين و قاعدين بيدفوا بعض في الصندوق اياه  لحد ما اعرف لأصحابهم عناوين.. حكيالهم فيها عن حاجات كتير و سألاهم فيها عن حاجات اكتر نفسي اعرفها من خط ايديهم مش بس من الكلام. هو الايميل بيبان فيه الحماسة؟ تقدر تحط عليه بارفان؟ تطبعي فيه بوسة بالروج؟ بيبان فيه حيرتك ولا لغبطتك من كم الكلمات المشطوبة (اللي هحاول اقراها)؟ ينفع تحط في أيميل خصلة من شعرك زي اللي طنط  "م"  كانت بتحوطها لاونكل "م" ايام ما كانوا مخطوبين؟ لو بكيت و انت بتكتب بيبان في الايميل زي ما الدموع بتعلم في الورقة؟! كلمني عن احساس الونس و الصحبة اللي بتحسه لما تمسك جواب مكتوب لك من ايد الحبيب الغايب، مبتحسش كأنك خدته بالحضن؟ و تحط الجواب في محفظتك و كأنك واخد الشخص معاك في كل مكان سند و ونس من ريحته.. 
الجوابات فيها شيء من التقارب كل التكنولوجيا بكل صورها و فيديوهاتها مش بتقدر توصله.. في الاخر انت عارف ان دي حاجة virtual و digital مفيش في إيدك حاجة منه ولا فيها حتة من روحه..
على قد التكنولوجيا ما بتقرب البعيد بس برده بتبعد القريب.. بتبعد الروح.. مبقيناش نستخدمها اضطرار لحد ما سحبت كل الدفا و الحميمية من حياتنا..



جواب لله. من كتب جواب بيداه التقاه!
@marmaritaaa


Wait a minute mr postman. Plz mr Postman, look & see if there is a letter in your bag for me.

No comments:

Post a Comment